အာဆင်နယ်အသင်းနဲ့ အပြန်အလှန် စိတ်ဝင်စားခဲ့ဖူးကြပြီး အကောင်အထည်ဖော်ဖို့ မဖြစ်နိုင်ခင်မှာပဲ လောင်းကစားမှုတွေကြောင့် ရှစ်လ ပွဲပယ်ပြစ်ဒဏ်ကျသွားတဲ့ တိုက်စစ်မှူး အီဗန် တိုနီကို ဘရန့်ဖို့ဒ်တို့အနေနဲ့ လာမယ့် ဇန်နဝါရီမှာ ရောင်းချသွားဖို့ အရိပ်အမြွက်ဆိုလိုက်ပြီဖြစ်ပါတယ်။
နည်းပြ သောမတ်စ် ဖရန့်ခ်အနေနဲ့ ဒီလထဲမှာ အသင်းနဲ့ လေ့ကျင့်ခန်း ပြန်ဆင်းခွင့်ရထားတဲ့ အသက် ၂၇ နှစ်အရွယ် တိုက်စစ်မှူးကို ပရီးမီးယားလိဂ်ရဲ့ အကောင်းဆုံး နံပါတ် ၉ တိုက်စစ်မှူးတစ်ဦးလို့ ချီးကျူးထားပြီး သင့်တော်တဲ့ ကမ်းလှမ်းမှု ရရှိမယ်ဆိုရင် ရောင်းချဖို့ အဆင်သင့်ပဲလို့ ဆိုသွားခဲ့တာပါ။
ပြီးခဲ့တဲ့ မေလ ၁၇ ရက်နေ့ကစပြီး အင်္ဂလန်ဘောလုံးအဖွဲ့ချုပ် FA ရဲ့ ဘောလုံးကစားခွင့် တရားဝင် ပိတ်ပင်ခံထားရတဲ့ တိုနီအနေနဲ့ လာမယ့် ဇန်နဝါရီလလယ်လောက်မှာ ပြန်လည်ကစားခွင့်ရှိနေပြီဖြစ်ပြီး သူ့ကို အာဆင်နယ်အသင်းအပြင် မန်ချက်စတာယူနိုက်တက်၊ တော့တင်ဟမ်ဟော့စပါးနဲ့ ချဲလ်ဆီးအသင်းတွေက စိတ်ဝင်စားနေကြတာဖြစ်ပါတယ်။
ဇန်နဝါရီမှာ သူ့ကို ခေါ်ယူဖို့ကတော့ စွန့်စားရမယ့်လုပ်ရပ်လည်းဖြစ်ပြီး ဘရန့်ဖို့ဒ်တို့ကတော့ အလောတကြီး ရောင်းချသွားဖို့ ပြန်လည်စဉ်းစားနိုင်သလို ခြေစွမ်းကို ပြန်လည်မှတ်ကျောက်တင်ခံပြီးမှ ဈေးကွက်တင် Showcase ထဲ ထည့်ရောင်းဖို့ဖြစ်နိုင်ပေမယ့် ချဲလ်ဆီးလို စဉ်းစားတွေးတောမှု မရှိဘဲ တစ်ရှူးထိုးလုပ်တတ်တဲ့ အသင်းကတော့ နည်းပြ ပိုချက်တီနိုအတွက် လိုအပ်နေတဲ့ နံပါတ် ၉ တစ်ဦးကို မိုက်မိုက်ကန်းကန်း ခေါ်ယူသွားနိုင်တာပါ။
အာဆင်နယ်တို့ကတော့ တိုက်စစ်မှူး လိုအပ်နေတာ မှန်ပေမယ့် ဇန်နဝါရီအထိတော့ အသင်းကို စောင့်ကြည့်စစ်ဆေးသွားဦးမှာဖြစ်လို့ တိုနီ၊ နည်းပြ ဖရန့်ခ်နဲ့ ဘရန့်ဖို့ဒ်တို့အနေနဲ့ ပြန်လည်ကစားခွင့်ရချိန်မှာ ဘယ်လိုမျိုး တုံ့ပြန်မလဲ စောင့်ကြည့်ရမှာဖြစ်ပြီး တောသားချဲပေါက် တော့ဒ် ဘိုလီနဲ့ ချဲလ်ဆီးတို့ကတော့ ပိုမိုစွန့်စားနိုင်ခြေရှိနေကြောင်းလည်း ဖော်ပြလိုက်ရပါတယ်။
REF: INTERNET SOURCES
PHOTOS CREDIT TO OWNERS
SPORTS A2Z.
